காஞ்சிபுர பட்டு, அஸ்சாமின் முகா பட்டு, கோசா சில்க் - நூல் உருவாகும் விதம்
நன்றி : http://karurdevangar.blogspot.in/2013/12/blog-post_8.html#more
காஞ்சிபுரம் பட்டு
நம்ம ஊர் பெண்கள் பட்டுப்புடவைகளை துவைப்பது என்பதே அரிது. ஏனென்றால், துவைத்தால் சாயம் போய்விடும். ஜரிகை புடவையில் இருந்து வந்துவிடும். துவைக்க துவைக்க பழைய பட்டுப்புடவை போன்று தோற்றமளிக்கும் என்று பயந்தே பல பெண்கள் பட்டுப் புடவைகளை துவைக்காமலும், அணிந்துகொள்ளாமலும் வாங்கிய பட்டுப் புடவைகளை அப்படியே பத்திரப்படுத்தியே அழகு பார்ப்பார்கள். ஆனால், இந்த மாதிரி சமாச்சாரங்களுக் கெல்லாம் அப்பாற்பட்டது தான் முகா. இந்தப் பட்டுப் புடவையை துவைக்க துவைக்க இதன் அழகு கூடும். அதேபோல எத்தனை முறை துவைத்து துவைத்து அணிகிறோமோ, அதற்குத் தகுந்தார்போல் புதுப் புடவை போன்று காட்சியளிக்குமாம்.
தேவாங்கரின் கோசா சில்க்
சட்டீஸ்கர் தேவாங்கரின் கைத்தறியில் உருவாகும் கோசா சில்க்:-
சட்டீஸ்கர் மாநிலத்தில் வாழ்ந்து வரும் தேவாங்கர்களின் கைத்தறியில் உருவாகும் கோசா சில்க் சேலைகள் என்றாலே இந்தியாவில் மட்டுமல்ல, வெளிநாட்டிலும் பிரசித்தம் ஆகும்.
கோசா சில்க் என்று நம்மில் பலர் கேள்விப்பட்டிருக்கலாம். ஆனால், அந்த ரகத்தை நெய்பவர்கள் குறிப்பாக சட்டீஸ்கர் மாநிலத்தில் வாழும் தேவாங்கர்கள்தான் என்ற செய்தி நம்மில் எத்தனை பேருக்குத் தெரியும். கோசா பட்டுச் சேலைகள் மட்டுமல்லாது சுடிதார், ஆண்களுக்கான செர்வானி ஆடைகளும் உருவாக்கப்படுகின்றன.கோசா பட்டு சட்டீஸ்கர் மாநிலத்தில் வாழ்ந்து வரும் தேவாங்க சமூகத்தினரால் நெய்யப்படும் கைத்தறிப்பட்டாகும். இம்மாநிலத்தின் சம்பா, பிளாஸ்பூர், ரெய்கர், ஜக்தல்பூர் மற்றும் பாஸ்டர் பகுதிகளில் கோசா பட்டுச் சேலைகள் மற்றும் துணிகள் நெய்யப்படுகின்றன. மேலும்,மகாராஷ்டிரா மாநிலத்தின் பந்தாரா மாவட்டத்தில் உள்ள கணேஷ்பூர் என்ற கிராமத்திலிருந்து 1871 ஆம் ஆண்டு முதலே கோசாபட்டு உற்பத்தி செய்யப்பட்டு வெளிநாடுகளுக்கு ஏற்றுமதி செய்யப்பட்டு வருவது இங்கு குறிப்பிடத்தக்கது. கோசா என்பதன் அர்த்தம் உள்ளூர் மொழியில், பட்டுப் புழுக்கூடு என்பதாகும். அர்ஜுன், சாஜா(அ) சால் மரத்தின் மேல் வளரும் பட்டுப் புழுக்களில் இருந்து,கோசா பட்டிழைகள் உருவாக்கப்படுகிறது. கோசாபட்டு புழுக்கூடுகள் எலுமிச்சம் பழ அளவு இருக்கும். இவற்றை காட்டில் வாழும் பழங்குடி இனத்தவர்கள் சேகரித்து கைத்தறி நெசவு நெய்யும் தேவாங்கரிடமோ அல்லது வர்த்தகரிடமோ விற்பனை செய்கின்றனர்.இந்தப் பட்டு புழுக்கள் இயற்கையாகவே, தேன் நிறத்திலும், வெண்மை கலந்த பழுப்பு நிறத்திலும், மஞ்சள் நிறத்திலும்,சாம்பல் நிறத்திலும்,இளம் மஞ்சள் நிறத்திலும் உள்ளன. இயற்கையாகவே இந்த நிறங்கள் அமைந்திருந்தாலும் அப்பட்டு புழுக்களிலிருந்து எடுக்கப்படும் பட்டிழைகளில் இயற்கை சாயங்கள் ஏற்றப்பட்டு விதவிதமான நிறங்களில்,பட்டிழைகள் உருவாக்கப்படுகின்றன.
ஒவ்வொரு கோசா பட்டு புழுக்களிலிருந்தும் 1 முதல் 2 கிராம் வரை பட்டுகள் எடுக்கப்படுகின்றன. இதிலிருந்து 274.32 மீட்டர் அளவுள்ள பட்டிழைகள் தயாரிக்க முடியும். கோசாப் பட்டு, காகிதத்தைப் போன்று மென்மையானதாகவும், அதே சமயத்தில் உறுதியானதாகவும் உள்ளது. இப்பட்டின் இழைநயம்,அதில் அழகான உருவங்களை அச்சிடுவதற்கும், வரைவதற்கும் ஏற்றதாக உள்ளது.
கை வேலைப்பாடுகள் மற்றும் கோசா பட்டின் தரத்தைப் பொறுத்து ரூ.400 லிருந்து பல்லாயிரக்கணக்கான ரூபாய் மதிப்பு வரை விலை நிர்ணயம் உள்ளது. திருமணம் மற்றும் விசேஷ நிகழ்ச்சிகளில் உடுத்துவதற்கு ஏற்றதாக வெள்ளி மற்றும் தங்க ஜரிகை கொண்டு கோசாபட்டுச் சேலைகள் உற்பத்தி செய்யப்படுகின்றன.
கோர்பா மற்றும் சம்பா பகுதிகளில் உற்பத்தி செய்யப்படும் கோசா பட்டுச் சேலைகள் உயர்தரம் உடையவையாகும். சம்பா பகுதியில் உற்பத்தி ஆகும் கோசாபட்டு உலகிலேயே மிக உயர்ந்த தரப்பட்டாகக் கருதப்படுகிறது. இங்கு உற்பத்தி ஆகும் கோசாபட்டுச் சேலைகள் மற்றும் துணிகள் ஐரோப்பா,வளைகுடா மற்றும் அமெரிக்கா போன்ற நாடுகளுக்கு ஏற்றுமதி செய்யப்படுகிறது.
கோசா பட்டு நெய்வது குறித்து சம்பா மாவட்டத்தில் சூரி என்ற கிராமத்தில் வசிக்கும் கைத்தறி உற்பத்தியாளரான திரு. சந்திரமணி தேவாங்கன் கூறியதாவது:
என்னிடம் 100 கைத்தறிகள் உள்ளன. கோசா பட்டுப்புழுக் கூட்டினை பழங்குடியின மக்கள் சேகரித்து, எங்களிடம் விற்கின்றனர். எலுமிச்சம்பழ அளவுள்ள அந்த பட்டுப்புழுக் கூட்டினை மாலையாகக் கோர்த்து வெயிலில் உலர வைக்கிறோம். பட்டுப் புழுக்களிலிருந்து பட்டு இலைகளை உற்பத்தி செய்யும் பணியில் வீட்டுப் பெண்கள் கவனம் செலுத்துகின்றனர். பெண்களால் உற்பத்தி செட்யப்பட்ட பட்டிழைகளைக் கொண்டு பட்டு உற்பத்தி செய்யும் பணியில் ஆடவர் ஈடுபடுகின்றனர். குழந்தைகளின் படிப்புச் செலவுகளை ஈடுகட்டுவதற்கு பெண்களின் வருமானம் பயன்படுகிறது இவ்வாறு திரு. சந்திரமணி தேவாங்கன் கூறினார்.
சம்பா மாவட்டத்தில் உள்ள சந்திராபூர் நகர் தேவாங்கர்கள் பெருவாரியாக வாழும் ஊர் ஆகும். கோசா பட்டு உற்பத்தியில் சந்திரபூருக்கும் முக்கிய இடம் உண்டு. இந்நகரில் வாழும் பதிராம் தேவாங்கன் கோசா பட்டு உற்பத்தியை பற்றி கூறியதாவது:
கோசாபட்டுச் சேலை உற்பத்தி என்பது பல கட்டங்களைக் கொண்டதாகும். இதில் ஆரம்பக் கட்டம் முதல் கடைசி கட்டம் வரை எங்கள் குடும்பத்தில் உள்ள அனைவரும் பணியாற்றுகின்றோம். எங்களுடைய குடும்பத்தில் உள்ளவர்கள் அனைவரும் இந்த சேலை உற்பத்தியின் பல்வேறு கட்ட பணிகளில் பங்கு கொள்வதை நீங்களே பார்க்கலாம்.
கோசாபட்டுப் புழுக்களை பழங்குடியினர் சேகரித்து எங்களிடம் விற்கின்றனர். அந்த பட்டுப் புழுக்களிலிருந்து நல்லதைத் தேர்ந்தெடுத்து,தண்ணீரில் போட்டு கொதிக்க வைப்போம். பின்னர் பட்டுப்புழுக் கூட்டிலிருந்து பட்டிழை உற்பத்தி செய்து இயற்கை சாயமிடுவோம். சாயமிட்ட பட்டிழைகளைக் கொண்டு கைத்தறியின் மூலம் கோசா பட்டுச் சேலைகள் உற்பத்தி செய்வோம்.
ஒரு கோசாபட்டு சேலைகள் உருவாக்க ஒரு வாரம் வரை எடுத்துக் கொள்வோம். இதயம் தொட்டு இணைத்த பட்டில் உருவாகுபவை, எங்கள் கோசா பட்டுச் சேலைகள் என்றார் பதிராம் தேவாங்கன்.
பதிராம் தேவாங்கனின் மனைவி கூறியதாவது:
காலம் காலமாக பரம்பரை பரம்பரையாக எங்களுடைய சமூகத்தவர்கள் நெய்து வருபவை இந்த கோசா பட்டுச் சேலைகள். சீன பட்டை விட உயர்ந்த தரம் உடையதாக கோசா பட்டு இருப்பதை இரண்டையும் ஒப்பிட்டு பார்த்தாலே உங்களால் உணர முடியும் என்றார்.
சம்பா நகரில் கோசா பட்டுச் சேலை உற்பத்தியாளராக உள்ள அஜய் தேவாங்கன் கூறியதாவது:
நமது தேவாங்க சமூகத்தவர்கள் கோசா பட்டுச் சேலை உற்பத்தியாளர்களாக உள்ளனர். அவர்களுக்கு ஒரு சேலை உற்பத்தி செய்ய ரூ.500 வரை கூலி கிடைக்கிறது. ஒரு சேலை நெய்து முடிக்க மூன்றிலிருந்து ஐந்து நாட்கள் வரை ஆகின்றது. இந்த வருமானத்தை வைத்துதான் நெசவாளர்கள் குடும்பத்தை நடத்த வேண்டும். முந்தைய காலகட்டத்தில் உள்ளது போல் தற்பொழுது சேலை விற்பனை இல்லை. எங்களுக்கு இந்தத் தொழிலைத் தவிர வேறு தொழில் தெரியாது. எனவே, இந்தத் தொழிலைத்தான் செய்து கொண்டிருக்கிறோம். என்னிடத்தில் 100 கைத்தறிகள் உள்ளன. இவ்வாறு அவர் அஜய் தேவாங்கன் கூறினார்.
சட்டீஸ்கரில் தற்போது அஹிம்சா பட்டு என்ற புதியவகை கோசாபட்டுச் சேலைகள் தயாரிக்கப்படுகிறது. பட்டுக் கூட்டிலிருந்து புழுவானது பட்டுப் பூச்சியாக வெளியேறிய பிறகு உள்ள பட்டுக்கூட்டிலிருந்து தயாரிக்கப்படும் பட்டுச் சேலைகளைக் கொண்டு நெய்யப்படுபவை இந்த அஹிம்சா கோசா பட்டுச் சேலைகள்.
புதிய ரகங்கள் தோன்றும் அதே சமயத்தில் , தறிக்குழியில் தங்கள் குழந்தைகள் வீழ்ந்து விடக்கூடாது என்ற எண்ணம் அம்மாநில தேவாங்கர்கள் மனதில் மேலோங்கியுள்ளதைக் கண்கூடாகப் பார்க்க முடிகிறது. தமது பிள்ளைகளைக் கல்வியில் முன்னேறச் செய்ய வேண்டும் என்ற எண்ணமே அவர்களிடம் மேலோங்கியுள்ளது.
மத்திய பிரதேசத்திலிருந்து, சட்டீஸ்கர் மாநிலம் பிரிக்கப்பட்டது. அம்மாநிலத்தில் வசிக்கும் தேவாங்கர்களால், 1981 ஆம் ஆண்டு சட்டீஸ்கர் தேவாங்கன் சொசைட்டி என்ற அமைப்பு ஆரம்பிக்கப்பட்டது. இது சட்டீஸ்கர் மாநிலத்தில் வாழும் தேவாங்கர்களின் நலனைப் பாதுகாக்க உருவாக்கப்பட்டது. பல்வேறு சமூகப் பணிகளை இவ்வமைப்பு செய்து வருகிறது. திருமணப் பதிவு உள்ளிட்ட பல்வேறு சேவைகள் அதிலடங்கும். சட்டீஸ்கர் மாநில தேவாங்க மக்களிடையே 60 விதமான வம்சங்கள் உள்ளன. இம்மாநிலத்தில் உள்ள தேவாங்கர்களால் அன்னை ஸ்ரீ பரமேஸ்வரி விழா கொண்டாடப்படுகிறது. மேற்கண்ட அமைப்பின் சார்பாக பசந்த் பஞ்சமி தினமான ஜனவரி 31, 2009 அன்று அன்னை ஸ்ரீ பரமேஸ்வரி விழா மாநிலம் தழுவிய அளவில் சிறப்பாகக் கொண்டாடப்பட்டது. இதன் மூலம் சமூக மக்களிடம் ஒற்றுமையையும், ஒருமைப்பாட்டையும் வளர்க்க முடியும் என்பது அவர்களின் நம்பிக்கை. ......
